„შუქნიშნებთან დამონტაჟდება კამერები, რომლებიც გამონაბოლქვს გააკონტროლებს“ - რა წერია თბილისის ატმოსფერული ჰაერის ხარისხის მართვის დოკუმენტში

„თბილისში შუქნიშნებთან დამონტაჟდება ვიდეოკამერები, რომლებიც მანქანების გამონაბოლქვს გააკონტროლებს“,- ამის შესახებ მოძრაობა „ჩემი ქალაქი მკლავს“ დამფუძნებელმა გიორგი ჯაფარიძემ „ბიზნესპრესნიუსთან“ განაცხადა.

მისი თქმით, შესაბამისი ცვლილებები თბილისის ატმოსფერული ჰაერის ხარისხის მართვის 2024-2026 წლების სამოქმედო გეგმაში გაიწერა.

როგორც მან აღნიშნა, გეგმის მიხედვით, ასევე გამკაცრდება კონტროლი სამშენებლო მტვრის შემცირების მიმართულებით, მერიის შესაბამის სამსახურს დაემატება ქუჩების მორეცხვისთვის საჭირო სპციალური მანქანები და მნიშვნელოვნად გაიზრდება გამწვანებული ტერიტორიების ფართობი.

„მნიშვნელოვანია, რომ დამტკიცდა თბილისის ჰაერის ხარისხის მართვის 2024-2026 წლების გეგმა. ქალაქს ეს ნამდვილად ძალიან სჭირდება. გარემოს დაცვის სამინისტროსთან ერთად თითქმის ნახევარი წელი მიმდინარეობდა ამ გეგმაზე მუშაობა და პროცესში ევროპელი სპეციალისტებიც იყვნენ ჩართული.

ჩვენი რეკომენდაციები გათვალისწინებულ იქნა გამწვანების, გზების მორეცხვის და მანქანების გამონაბოლქვის კონტროლის კუთხით. შესაბამისად, გეგმაში არის როგორც სატრანსპორტო, ასევე სამშენებლო, საგზაო და გამწვანების მიმართულებები. კერძოდ, ჩვენი რეკომენდაცია იყო, რომ უნდა დამატებულიყო ქუჩების მომრეცხავი მანქანები და ეს მოხდება.

გამონაბოლქვის კონტროლის მიმართულებით, გეგმაში გაიწერა, რომ თბილისის მასშტაბით უნდა დამონტაჟდეს 3 კამერა შუქნიშნებთან, რომელიც მანქანის დაძვრის დროს ავტომატურად გაზომავს გამონაბოლქვში მავნე ნივთიერებების დონეს. ეს კამერები იქნება მოძრავი და პერიოდულად შეიცვლება მათი ლოკაციები.

მშენებლობის მიმართულებით, მნიშვნელოვანი პუნქტია ის, რომ სამშენებლო მოედანზე მტვრის შემცირებისთვის უნდა მოხდეს სამშენებლო მასალების ნარჩენების, მათ შორის ქვიშის და ცემენტის ისე შეფუთვა, რომ არ მოხდეს მათი ამტვერება და განისაზღვრა დარღვევისთვის ჯარიმები.

თავისთავად, ასევე გაიწერა, რომ აღნიშნულ 3 წელში დედაქალაქში მნიშვნელოვნად უნდა გაიზარდოს გამწვანებული ტერიტორიების ფართობი“,- აღნიშნა გიორგი ჯაფარიძემ.

ცნობისათვის, თბილისის აგლომერაციის ატმოსფერული ჰაერის ხარისხის მართვის 2024-2026 წლების გეგმაში აღნიშნულია, რომ დედაქალაქში მოხდება ჭკვიანი შუქნიშნების სისტემის დიზაინის გაფართოება თბილისში ჰაერის რეალური მდგომარეობის გათვალისწინების მიზნით.

დაგეგმვის პროცესში არსებული ჭკვიანი შუქნიშნების სისტემაში ინტეგრირებული იქნება მოდული ჰაერის რეალური მდგომარეობის გასათვალისწინებლად. ასევე დამონტაჟებული და სისტემაში ჩართული იქნება აზოტის ოქსიდებისკონცენტრაციის მონიტორინგის სულ მცირე 15 სადგური.

პროექტის მიხედვით, შესრულების ვადად განსაზღვრულია 2026 წლის მე-4 კვარტალი. ამავე გეგმის მიხედვით, პროექტის ჯამური ღირებულებაა 804,120 ლარი, დაფინანსების წყარო კი გერმანიის განვითარების ბანკი (KFW)