„უცებ ისე დამძიმდა, რომ წნევას ვეღარ იჭერდნენ... მშობლები განადგურდნენ, ერთადერთი შვილი აღარ ჰყავთ" - როგორ იმსხვერპლა ვირუსმა 13 წლის დედისერთა გოგონა?
ვირუსული ინფექციის გართულებით სიღნაღში 13 წლის გოგონა, ანა კიკილაშვილი გარდაიცვალა. ბავშვი სოფელ ჯუგაანის სკოლის, მეშვიდე კლასის მოსწავლე იყო. როგორც ირკვევა, მოზარდი დედამ იმ დღეს ოჯახის ექიმთან მიიყვანა, ექიმმა ურჩია ცენტრალურ კლინიკაში გადაყვანა, მაგრამ მალე ისე დამძიმდა ანას მდგომარეობა, რომ სასწრაფოს გამოძახება გახდა საჭირო. სასწრაფომ გოგონა ჯერ წნორში, "არქიმედეს” კლინიკაში გადაიყვანა, მაგრამ ექიმებმა მისი თბილისში გადაყვანის გადაწყვეტილება მიიღეს. გოგონა თბილისში ჩამოიყვანეს, თუმცა ექიმებმა მისი გადარჩენა ვეღარ შეძლეს.
მომხდარ ტრაგედიაზე"ამბები" სოფელ ჯუგაანის საჯარო სკოლის დირექტორი მარიამ ბოლაშვილი ესაუბრა:
"ძალიან მძიმე ფაქტი მოხდა და განვიცდით ყველანი. ანა დედისერთაა და სოფელში მშობლებთან ერთად, ბედნიერად ცხოვრობდა. დღეს ჩვენი სოფლის ოჯახის ექიმსაც ვესაუბრე. ის ამბობს, რომ გოგონა დედამ მიუყვანა კლინიკაში. ექიმმა გასინჯა ბავშვი და რადგან ის მუცელს იტკივებდა, დედას უთხრა, რომ ბავშვი წაეყვანა "არქიმედეს" კლინიკაში.
ბავშვს უარი უთქვამს დედისთვის და სახლში წასულან. ძალიან ყურადღებიანია ჩვენი სოფლის ექიმი და მას მალევე მოუკითხავს ბავშვი. დედას უთქვამს, არ მოგვყვებაო, ექიმს ისევ უთქვამს, რომ სასწრაფოდ წაეყვანა კლინიკაში, ამასობაში უკვე ძალიან დამძიმდა ბავშვის მდგომარეობა. ოჯახის ექიმთან რომ იყო, იქიდან 3 საათში ბავშვი ისე დამძიმდა, რომ სასწრაფოს გამოძახება გახდა საჭირო და უკვე ძალიან ცუდად იყო ბავშვი. არადა სამი საათით ადრე, შუა დღით მოიყვანეს თავისი ფეხით ოჯახის ექიმთან.
არც დიდი ხანი არ ჰქონდა ეს ვირუსი, როგორც ჩანს. 8 მარტს ბავშვი ძალიან კარგად იყო, თანატოლებთან ერთად ერთობოდა და ალბათ, ორი დღე იყო ცუდად. სამწუხაროდ, ძალიან სწრაფად მოხდა ეს ყველაფერი. ოჯახის ექიმიდან რომ წამოვიდა. სადღაც 3 საათში ისე დამძიმდა, რომ წნევას ვეღარ იჭერდნენ, უვარდებოდა.
"არქიმედეში" რომ შეხედეს, უკვე ძალიან მძიმედ იყო გოგონა, ექიმი ცდილობდა როგორმე წნევა შეენარჩუნებინა ბავშვისთვის და სასწრაფოდ გადაიყვანეს თბილისში, კლინიკაში, მაგრამ სამწუხაროდ, ბავშვი გარდაიცვალა, ვერ გადაარჩინეს. იმავე დღეს გარდაიცვალა. სასწრაფოს ექიმს რომ ველაპარაკე, მითხრა, აქედან რომ გადავიყვანეთ უმძიმესი იყოო, უკვირს ყველას, ასე სწრაფად რა მოხდა. მაღალი ტემპერატურა ჰქონდა და იმ 3 საათში ფაღარათი და ღებინება დაეწყო, დამძიმდა და გარდაიცვალა. ისეთი ლამაზი ბავშვი იყო სულ მისი ყურება გინდოდა. მშობლები განადგურდნენ, ერთადერთი შვილი აღარ ჰყავთ.
ახლა მოვედი სამძიმრიდან და განადგურებული ვარ. ღორის გრიპი აღმოჩნდა ეს ვირუსი, რამაც 13 წლის მოზარდის სიცოცხლე იმსხვერპლა. არადა ბავშვი სრულიად ჯანმრთელი იყო და არანაირი ქრონიკული დაავადება მას არ ჰქონდა. გლოვობს მთელი სოფელი, უნდა გენახათ დღეს რა ხდებოდა ჩვენს სკოლაში. 200 ბავშვი იყო და მთელ სკოლაში ბავშვების ხმა არ ისმოდა, მერხთან ისხდნენ დაღონებულები და დადუმებულები. ვერც იფიქრებდი, რომ სკოლაში ამდენი ბავშვი იყო", - თქვა ჯუგაანის საჯარო სკოლის დირექტორი მარიამ ბოლაშვილმა.
ambebi.ge
„ადგომის დროს და ძილის წინ… ეს ყველა ავადმყოფობის წამალია” — უებარი მეთოდი მამა ვიტალის წერილიდან
„დანა რამდენჯერმე დაარტყა…“ – ქართველმა ბიჭმა პოლონეთში მეგობარი, ისიც ქართველი, მძიმედ დაჭრა