უნებართვოდ აშენებულ კერძო სახლებს მეპატრონეებს დაუკანონებენ - რა წერია მთავრობის ახალ დადგენილებაში
„საქართველოს სივრცის დაგეგმარების, არქიტექტურული და სამშენებლო საქმიანობის კოდექსის“ თანახმად, დამტკიცდა ის გეოგრაფიული არეალები, სადაც 2023 წლის 1-ელ დეკემბრამდე უნებართვოდ ან/და პროექტის დარღვევით აშენებული საცხოვრებელი სახლების დაკანონებისთვის დამატებითი კრიტერიუმები განისაზღვრა.
კერძოდ, დადგენილების მიხედვით, აღნიშნულ არეალებში მოხვდა: ბახმარო, ბაკურიანი, შოვი, უწერა, ხადა, ურეკი-შეკვეთილი, დაბა აბასთუმანი, შაორის ტბა, ბორჯომი, დიდი მიტარბი, დუშეთი, ზუგდიდი, კასპი, გრიგოლეთი, მალთაყვა, ლებარდე, მცხეთა, რუსთავი, ფოთი, ქობულეთი, ქუთაისი, სტეფანწმინდა, ჩხოროწყუ, წყალტუბო და სურამი
ამასთან, აღნიშნულ სიაში მოხვდა შემდეგი სოფლებიც: ნიკორწმინდა, წესი, ჭრებალო, მირაშხანი, ხერთვისი, ნაქალაქევი, თმოგვი, ტოლოში, აფნია, გოგაშენი, კუმურდო, ხავეთი, დაბნია, დართლო, დიკლო, დოჭუ, ეთელთა, ფარსმა, გირევი, ინდურთა, ჯვარბოსელი, ომალო, ქვემო ალვანი, ზემო ალვანი, შენაქო, ველისციხე, იყალთო, არცხელი, ცალდაში, ჩვაბიანი, ჟაბეში, ჟამუში, ლახირი, მაჯვდიერი, ღვებრა, ჭოლაში, ზარდლაში, მურკმელი და მრავალძალი.
რაც შეეხება დამატებით კრიტერიუმებს, ასეთია: კერძო საცხოვრებლები და არსებობის შემთხვევაში დამხმარე ნაგებობები კანონიერად მიიჩნევა იმ შემთხვევაში თუ აკმაყოფილებს კანონის მოთხოვნებს და ამასთან, „მუნიციპალიტეტის აღმასრულებელი ორგანოს მიერ გაცემული ცნობით დადასტურდება მიწის ნაკვეთზე განთავსებული შენობა-ნაგებობების თავსებადობა სივრცის დაგეგმარებისა და ქალაქთმშენებლობითი გეგმებით ან/და მათი კონცეფციებით განსაზღვრულ შესაბამის სივრცით კატეგორიასთან ან/და ფუნქციურ ზონასთან“.
გარდა ამისა, მთავრობის დადგენილების მიხედვით, კულტურული მემკვიდრეობის ძეგლის სტატუსის მქონე არეალებში მდებარე ინდივიდუალური სახლები სამშენებლო დოკუმენტაციის ან შენობა-ნაგებობის ექსპლუატაციაში მიღების დამადასტურებელი დოკუმენტის საფუძველზე მიიჩნევა კანონიერად.
ამასთან, ქვეყნის მთელ ტერიტორიაზე, (გარდა კულტურული მემკვიდრეობის ძეგლის სტატუსის მქონე ტერიტორიების და თბილისისა), 2023 წლის 1-ელ დეკემბრამდე უნებართვოდ ან/და პროექტის დარღვევით აშენებული ინდივიდუალური საცხოვრებელი სახლის აღიარებისთვის საჭიროა აკრედიტებული ინსპექტირების ორგანოს მიერ გაცემული ობიექტის მზიდი კონსტრუქციების მდგრადობისა და სეისმომედეგობის დამადასტურებელი საექსპერტო დასკვნა. აქვე აღნიშნულია, რომ მსგავსი დასკვნა პირველი კლასის შენობა-ნაგებობისთვის არ არის მოთხოვნილი.
ცნობისთვის, დადგენილება მიმდინარე წლის 17 ოქტომბერს გამოქვეყნდა და გამოქვეყნებისთანავე ამოქმედდა. დადგენილება 2024 წლის 26 მარტიდან წარმოშობილ ურთიერთობებზე ვრცელდება.
შეგახსენებთ, რომ სამშენებლო ამნისტიის შესახებ მთავრობამ ჯერ კიდევ 2023 წლის ნოემბერში განაცხადა. ამ ინიციატივის ავტორი მაშინდელი პრემიერი ირაკლი ღარიბაშვილი იყო. კერძოდ, ეს ამნისტია გავრცელდება, 2023 წლის 1-ელ დეკემბრამდე ფიზიკური პირის საკუთრებაში არსებულ მიწის ნაკვეთზე მდგომ შენობა-ნაგებობაზე, რომელიც სამშენებლო დოკუმენტაციის გარეშეა, ამნისტია გავრცელდება და მოქალაქეებს საკუთრების დაკანონების შესაძლებლობა ექნებათ. როგორც მაშინ იუსტიციის მინისტრი რატი ბრეგაძე აცხადებდა, სამშენებლო ამნისტია მილიონზე მეტ ადამიანს ეხება.
